Rritet numri i të varfërve në Britani (Video)

Situata e keqe ekonomike në Britani të Madhe dhe masat e kursimit kanë sjellë në pozitë të vështirë organizatat humanitare. Ato po kujdesen më shumë për të varfrit sesa institucionet shtetërore, shkruan Guardian.


Në veri të Londrës është një nga lagjet më të varfra në vend, banorët e së cilës varen nga ndihma e ofruar nga Haringey Food Bank - organizatës bamirësie për shpërndarje të ushqimit për nevojtarët. Kjo organizatë tërheq vërejtjen se të varfrit dhe të uriturit po shtohen.
Kjo organizatë u dëbua nga zyrat e saj në një depo të cilën e ka marrë një kontraktor i ndërtimit, ndërsa tani shpërndan ushqim në vetëm dy vende për ata që janë buzë mbijetesës, e numri i të cilëve është dyfishuar në 12 muajt e fundit. Kështu, organizata mezi po mbijeton, për çka ua kanë ndërprerë telefonin fiks, ndërsa është pushuar nga puna personeli administrativ.
Pritet që më shumë njerëz do të bien nën kufirin e varfërisë, përfshirë urinë e plotë, pasi po ndihen pasojat e reformave të fundit sociale të qeverisë së David Cameronit. Për rezultatet negative të deritanishme të këtyre masave dëshmon fakti se në dy fitet e fundit është shtuar numri i të ashtuquajturave Banka të Ushqimit, e mbi të gjitha i atyre që kanë nevojë për ushqim.
Siç shkruan Guardian, kjo është "një shenjë e qartë e varfërisë në rritje në shoqëri", ndaj është ironike se si politikanët lëvdojnë këto Banka, derisa ata në pushtet refuzojnë ndonjë ndërlidhje të veprimtarisë së tyre me rritjen e varfërisë, gjë të cilën e ka përmendi edhe ministri i Mjedisit - Ed Davey.
Aktivistët humanitarë thonë se deklaratat e tilla janë “të patolerueshme” dhe se Britania e Madhe po shkon drejt modelit amerikan të ndihmës sociale: pra, që personat e rrezikuar socialë do të varen nga mëshira e të pasurve e jo institucionet shtetërore.
Vullnetarët në Bankat e Ushqimit janë ballafaquar me rritjen e kërkesës, kështu që përparësi kanë familjet me fëmijë dhe ata me moshën mbi 65 vjet. Kjo ka shkaktuar frustrime në mesin e të uriturve dhe tek ata që ndihmojnë, sepse shteti i la në mëshirën e fatit.
Vullnetarët, ndërkohë, shpenzojnë edhe paratë e tyre për të siguruar një sasi minimale të ushqimit për të varfrit, në rendet e gjata para Bankave të Ushqimit. Këto organizata humanitare janë ballafaquar edhe me probleme të mëdha logjistike, e më së shumti me çështjen nëse puna e tyre po zgjidhë problemet e mëdha sociale që kanë ndodhur gjatë viteve të krizës ekonomike, të rënduar edhe nga politika e kursimit nga e cila nuk heq dorë ministri i Financave George Osborne, edhe pse Britania ka përjetuar të ashtuquajturën krizë me fund të trefishtë. -->